ch. 51
2.51.1
cum haec accepta clades est, iam C. Horatius et T. Menenius
consules erant. Menenius aduersus Tuscos uictoria
elatos confestim missus.
2.51.2tum quoque male pugnatum est,
et Ianiculum hostes occupauere; obsessaque urbs foret,
super bellum annona premente—transierant enim Etrusci
Tiberim—, ni Horatius consul ex Uolscis esset reuocatus.
adeoque id bellum ipsis institit moenibus, ut primo pugnatum
ad Spei sit aequo Marte, iterum ad portam Collinam.
2.51.3ibi quamquam paruo momento superior Romana res fuit,
meliorem tamen militem, recepto pristino animo, in futura
proelia id certamen fecit.
2.51.4A. Uerginius et Sp. Seruilius consules fiunt. post acceptam
proxima pugna cladem Ueientes abstinuere acie; populationes
erant, et uelut ab arce Ianiculo passim in Romanum
agrum impetus dabant; non usquam pecora tuta, non
agrestes erant.
2.51.5capti deinde eadem arte sunt qua ceperant
Fabios. secuti dedita opera passim ad inlecebras propulsa
pecora praecipitauere in insidias; quo plures erant, maior
caedes fuit.
2.51.6ex hac clade atrox ira maioris cladis causa
atque initium fuit. traiecto enim nocte Tiberi, castra Seruili
consulis adorti sunt oppugnare. inde fusi magna caede
in Ianiculum se aegre recepere.
2.51.7confestim consul et ipse
transit Tiberim, castra sub Ianiculo communit. postero die
luce orta nonnihil et hesterna felicitate pugnae ferox, magis
tamen quod inopia frumenti quamuis in praecipitia, dum
celeriora essent,
2.51.8agebat consilia, temere aduerso Ianiculo ad
castra hostium aciem erexit, foediusque inde pulsus quam
pridie pepulerat, interuentu collegae ipse exercitusque est
seruatus.
2.51.9inter duas acies Etrusci, cum in uicem his atque
illis terga darent, occidione occisi. ita oppressum temeritate
felici Ueiens bellum.
