ch. 58
2.58.1
tum primum tributis comitiis creati tribuni sunt. numero
etiam additos tres, perinde ac duo antea fuerint, Piso
auctor est.
2.58.2nominat quoque tribunos, Cn. Siccium, L.
Numitorium, M. Duillium, Sp. Icilium, L. Maecilium.
2.58.3Uolscum Aequicumque inter seditionem Romanam est
bellum coortum. uastauerant agros ut si qua secessio plebis
fieret ad se receptum haberet; compositis deinde rebus
castra retro mouere.
2.58.4Ap. Claudius in Uolscos missus,
Quinctio Aequi prouincia euenit. eadem in militia saeuitia
Appi quae domi esse, liberior quod sine tribuniciis uinculis
erat.
2.58.5odisse plebem plus quam paterno odio: se uictum
ab ea; se unico consule electo aduersus tribuniciam potestatem
perlatam legem esse, quam minore conatu, nequaquam
tanta patrum spe, priores impedierint consules.
2.58.6haec
ira indignatioque ferocem animum ad uexandum saeuo imperio
exercitum stimulabat. nec ulla ui domari poterat;
2.58.7tantum certamen animis imbiberant. segniter, otiose, neglegenter,
contumaciter omnia agere; nec pudor nec metus
coercebat. si citius agi uellet agmen, tardius sedulo incedere;
si adhortator operis adesset, omnes sua sponte motam
remittere industriam;
2.58.8praesenti uoltus demittere, tacite praetereuntem
exsecrari, ut inuictus ille odio plebeio animus
interdum moueretur.
2.58.9omni nequiquam acerbitate prompta,
nihil iam cum militibus agere; a centurionibus corruptum
exercitum dicere; tribunos plebei cauillans interdum et
Uolerones uocare.
