ch. 8
Ag.8.1
Atque hic tantus vir ut naturam fautricem habuerat in tribuendis animi virtutibus, sic maleficam
nactus est in corpore fingendo: nam et statura fuit
humili et corpore exiguo et claudus altero pede. quae
res etiam nonnullam afferebat deformitatem, atque
ignoti, faciem eius cum intuerentur, contemnebant;
qui autem virtutes noverant, non poterant admirari satis.
Ag.8.2
quod ei usu venit, cum annorum octoginta subsidio Tacho in Aegyptum missus esset et in acta cum
suis accubuisset sine ullo tecto stratumque haberet
tale, ut terra tecta esset stramentis neque huc amplius quam pellis esset iniecta, eodem quo comites
omnes vestitu humili atque obsoleto, ut eorum ornatus non modo in eis regem neminem significaret, sed
homines esse non beatissimos suspicionem praeberet.
Ag.8.3
huius de adventu fama cum ad regios esset perlata,
celeriter munera eo cuiusque generis sunt allata. his
quaerentibus Agesilaum vix fides facta est, unum esse
ex iis qui tum accubabant.
Ag.8.4
qui cum regis verbis
quae attulerant dedissent, ille praeter vitulinam et
eius modi genera obsonii, quae praesens tempus desiderabat, nihil accepit: unguenta, coronas secundamque
mensam servis dispertiit, cetera referri iussit.
Ag.8.5
quo facto eum barbari magis etiam contempserunt, quod
eum ignorantia bonarum rerum vilia potissimum sumpsisse arbitrabantur.
Ag.8.6
Hic cum ex Aegypto reverteretur, donatus a rege
Nectanabide ducentis viginti talentis, quae ille muneri
populo suo daret, venissetque in portum, qui Menelai
vocatur, iacens inter Cyrenas et Aegyptum, in morbum implicitus decessit.
Ag.8.7
ibi eum amici, quo Spartam
facilius perferre possent, quod mel non habebant, cera
circumfuderunt atque ita domum rettulerunt.
Eumenes
