| Antiphon, Speeches (XML Header) [genre: prose; rhetoric] [word count] [lemma count] [Antiph.]. | ||
| <<Antiph. 2β.7 | Antiph. 2β.10 (English) | >>Antiph. 2β.13 |
2β.9ὡς δὲ τόνδε note τὸν κίνδυνον οὐκ ἀσφαλέστερον τοῦ ἀπὸ τῆς γραφῆς ἡγούμην εἶναι , ἀλλὰ πολλαπλάσιον , εἰ μὴ παρεφρόνουν , διδάξω . ἁλοὺς μὲν γὰρ τὴν γραφὴν τῆς μὲν οὐσίας ᾔδη ἐκστησόμενος , τοῦ δὲ σώματος καὶ τῆς πόλεως note οὐκ ἀπεστερούμην , περιγενόμενος δὲ καὶ λειφθείς , κἂν ἔρανον παρὰ τῶν φίλων συλλέξας , οὐκ ἂν εἰς τὰ ἔσχατα κακὰ ἦλθον · ἐὰν δὲ νῦν καταληφθεὶς ἀποθάνω , ἀνόσια ὀνείδη τοῖς παισὶν ὑπολείψω , ἢ φυγὼν γέρων καὶ ἄπολις ὢν ἐπὶ ξενίας πτωχεύσω .
2β.10οὕτω μὲν ἃ κατηγόρηταί μου , πάντα ἄπιστά ἐστιν · ἀπολύεσθαι δὲ ὑφʼ ὑμῶν , εἰ καὶ εἰκότως μὲν ὄντως δὲ μὴ ἀπέκτεινα τὸν ἄνδρα , πολὺ μᾶλλον δίκαιός εἰμι . ἐγώ τε γὰρ φανερὸν ὅτι μεγάλα ἀδικούμενος ἠμυνόμην note· οὐ γὰρ ἂν εἰκότως ἐδόκουν ἀποκτεῖναι αὐτόν · τούς τε ἀποκτείναντας καὶ οὐ τοὺς αἰτίαν ἔχοντας ἀποκτεῖναι ὀρθῶς ἂν καταλαμβάνοιτε .
2β.11ἐκ δὲ παντὸς τρόπου ἀπολυόμενος τῆς αἰτίας ἔγωγε οὔτε εἰς τὰ τεμένη εἰσιὼν τὴν ἁγνείαν τῶν θεῶν μιανῶ , οὔτε ὑμᾶς πείθων ἀπολῦσαί με ἀνόσια πράσσω . οἱ δὲ διώκοντες μὲν ἐμὲ τὸν ἀναίτιον , τὸν δʼ αἴτιον ἀφιέντες , τῆς τε ἀφορίας αἴτιοι γίγνονται , ὑμᾶς τε ἀσεβεῖς εἰς τοὺς θεοὺς πείθοντες καταστῆναι πάντων ὧν ἐμὲ ἄξιόν φασι παθεῖν εἶναι δίκαιοί εἰσι τυγχάνειν .
2β.12τούτους μὲν οὖν τούτων ἀξίους ὄντας ἀπίστους ἡγεῖσθε · ἐμὲ δὲ ἔκ γε note τῶν προειργασμένων γνώσεσθε οὔτε ἐπιβουλεύοντα οὔτε τῶν οὐ προσηκόντων ὀρεγόμενον , ἀλλὰ τἀναντία τούτων πολλὰς μὲν καὶ μεγάλας εἰσφορὰς εἰσφέροντα , πολλὰ δὲ τριηραρχοῦντα , λαμπρῶς δὲ χορηγοῦντα , πολλοῖς note δὲ ἐρανίζοντα , μεγάλας δὲ ὑπὲρ πολλῶν ἐγγύας ἀποτίνοντα , τὴν δὲ note οὐσίαν οὐ δικαζόμενον ἀλλʼ ἐργαζόμενον κεκτημένον , φιλοθύτην δὲ καὶ νόμιμον ὄντα . τοιούτου δὲ ὄντος μου μηδὲν ἀνόσιον μηδὲ αἰσχρὸν καταγνῶτε .
| Antiphon, Speeches (XML Header) [genre: prose; rhetoric] [word count] [lemma count] [Antiph.]. | ||
| <<Antiph. 2β.7 | Antiph. 2β.10 (English) | >>Antiph. 2β.13 |
