| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 18.19.10 | Polyb. 18.20.7 (English) | >>Polyb. 18.21.5 |
18.20.4 τῆς δʼ ἑκατέρων πορείας μεταξὺ κειμένων ὄχθων ὑψηλῶν , οὔθʼ οἱ Ῥωμαῖοι συνεώρων τοὺς Μακεδόνας , ποῖ ποιοῦνται τὴν πορείαν , οὔθʼ οἱ Μακεδόνες τοὺς Ῥωμαίους .
18.20.5 ταύτην μὲν οὖν τὴν ἡμέραν ἑκάτεροι διανύσαντες , ὁ μὲν Τίτος ἐπὶ τὴν προσαγορευομένην Ἐρέτριαν τῆς Φθιώτιδος χώρας , ὁ δὲ Φίλιππος ἐπὶ τὸν Ὀγχηστὸν ποταμόν , αὐτοῦ κατέζευξαν , ἀγνοοῦντες ἀμφότεροι τὰς ἀλλήλων παρεμβολάς ·
18.20.6 τῇ δʼ ὑστεραίᾳ προελθόντες ἐστρατοπέδευσαν , Φίλιππος μὲν ἐπὶ τὸ Μελάμβιον προσαγορευόμενον τῆς Σκοτουσσαίας , Τίτος δὲ περὶ τὸ Θετίδειον τῆς Φαρσαλίας , ἀκμὴν ἀγνοοῦντες ἀλλήλους .
18.20.7 ἐπιγενομένου δʼ ὄμβρου καὶ βροντῶν ἐξαισίων , πάντα συνέβη τὸν ἀέρα τὸν ἐκ τῶν νεφῶν κατὰ τὴν ἐπιοῦσαν ἡμέραν ὑπὸ τὴν ἑωθινὴν πεσεῖν ἐπὶ τὴν γῆν , ὥστε διὰ τὸν ἐφεστῶτα ζόφον μηδὲ τοὺς ἐν ποσὶ δύνασθαι βλέπειν .
18.20.8 οὐ μὴν ἀλλʼ ὅ γε Φίλιππος κατανύσαι σπεύδων ἐπὶ τὸ προκείμενον , ἀναζεύξας προῄει μετὰ πάσης τῆς στρατιᾶς .
18.20.9 δυσχρηστούμενος δὲ κατὰ τὴν πορείαν διὰ τὴν ὀμίχλην , βραχὺν τόπον διανύσας τὴν μὲν δύναμιν εἰς χάρακα παρενέβαλε , τὴν δʼ ἐφεδρείαν ἀπέστειλε , συντάξας ἐπὶ τοὺς ἄκρους ἐπιβαλεῖν τῶν μεταξὺ κειμένων βουνῶν .
18.21.1
| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 18.19.10 | Polyb. 18.20.7 (English) | >>Polyb. 18.21.5 |
