| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 18.7.2 | Polyb. 18.8.2 (English) | >>Polyb. 18.8.10 |
18.7.7 ἐγγράπτους δόντες τῷ Φιλίππῳ τὰς ἑαυτῶν προαιρέσεις ἀκολούθως τοῖς προειρημένοις , ἐχωρίσθησαν , ταξάμενοι κατὰ τὴν ἐπιοῦσαν εἰς Νίκαιαν πάλιν ἀπαντήσειν ·
18.7.8 τῇ δʼ αὔριον οἱ μὲν περὶ τὸν Τίτον ἧκον ἐπὶ τὸν ταχθέντα τόπον ἐν ὥρᾳ πάντες ἦσαν , ὁ δὲ Φίλιππος οὐ παρεγίνετο .
18.8.1
κατατετριφὼς τὴν ἡμέραν , ὡς μὲν αὐτὸς ἔφη , διὰ τὴν ἀπορίαν καὶ δυσχρηστίαν τῶν ἐπιταττομένων , ὡς δὲ τοῖς ἄλλοις ἐδόκει , βουλόμενος ἐκκλεῖσαι τῷ καιρῷ τήν τε τῶν Ἀχαιῶν καὶ τὴν τῶν Αἰτωλῶν κατηγορίαν ·
18.8.3 ἑώρα γὰρ τῇ πρόσθεν ἀπαλλαττόμενος ἀμφοτέρους τούτους ἑτοίμους ὄντας πρὸς τὸ συμπλέκεσθαι καὶ μεμψιμοιρεῖν αὐτῷ .
18.8.4 διὸ καὶ τότε συνεγγίσας ἠξίου τὸν τῶν Ῥωμαίων στρατηγὸν ἰδίᾳ πρὸς αὐτὸν διαλεχθῆναι περὶ τῶν ἐνεστώτων , ἵνα μὴ λόγοι γένωνται μόνον ἐξ ἀμφοτέρων ἁψιμαχούντων , ἀλλὰ καὶ τέλος τι τοῖς ἀμφισβητουμένοις ἐπιτεθῇ .
18.8.5 πλεονάκις δʼ αὐτοῦ παρακαλοῦντος καὶ προσαξιοῦντος , ἤρετο τοὺς συμπαρόντας ὁ Τίτος τί δέον εἴη ποιεῖν .
18.8.6 τῶν δὲ κελευόντων συνελθεῖν καὶ διακοῦσαι τῶν λεγομένων , παραλαβὼν ὁ Τίτος Ἄππιον Κλαύδιον χιλίαρχον ὄντα τότε , τοῖς μὲν ἄλλοις μικρὸν ἀπὸ τῆς θαλάττης ἀναχωρήσασιν εἶπεν αὐτόθι μένειν , αὐτὸς δὲ τὸν Φίλιππον ἐκέλευσεν ἐκβαίνειν .
| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 18.7.2 | Polyb. 18.8.2 (English) | >>Polyb. 18.8.10 |
