Polybius, Histories (XML Header) [genre: prose] [word count] [lemma count] [Polyb.]. | ||
<<Polyb. 21.21.3 | Polyb. 21.21.10 (English) | >>Polyb. 21.22.7 |
21.21.7 εἰ μὲν αὐτοὶ κρίνετέ τινας τόπους διακατέχειν τῆς Ἀσίας τῶν ὄντων μὲν ἐπὶ τάδε τοῦ Ταύρου , ταττομένων δὲ πρότερον ὑπʼ Ἀντίοχον , τοῦτο καὶ μάλιστα βουλοίμεθʼ ἂν ἰδεῖν γενόμενον ·
21.21.8 καὶ γὰρ ἀσφαλέστατα βασιλεύσειν ὑμῖν γειτνιῶντες ὑπολαμβάνομεν καὶ μάλιστα μετέχοντες τῆς ὑμετέρας ἐξουσίας .
21.21.9 εἰ δὲ τοῦτο μὴ κρίνετε ποιεῖν , ἀλλʼ ἐκχωρεῖν τῆς Ἀσίας ὁλοσχερῶς , οὐδενί φαμεν δικαιότερον εἶναι παραχωρεῖν ὑμᾶς τῶν ἐκ τοῦ πολέμου γεγονότων ἄθλων ἤπερ ἡμῖν .
21.21.10 νὴ Δίʼ , ἀλλὰ κάλλιόν ἐστι τοὺς δουλεύοντας ἐλευθεροῦν . εἴγε μὴ μετʼ Ἀντιόχου πολεμεῖν ὑμῖν ἐτόλμησαν .
21.21.11 ἐπεὶ δὲ τοῦθʼ ὑπέμειναν , πολλῷ κάλλιον τὸ τοῖς ἀληθινοῖς φίλοις τὰς ἁρμοζούσας χάριτας ἀποδιδόναι μᾶλλον ἢ τοὺς πολεμίους γεγονότας εὐεργετεῖν .
21.22.1
μετὰ δὲ τοῦτον ἐβούλοντο μὲν εἰσάγειν Ῥοδίους . ἀφυστεροῦντος δέ τινος τῶν πρεσβευτῶν εἰσεκαλέσαντο τοὺς Σμυρναίους .
21.22.3 οὗτοι δὲ πολλοὺς μὲν ἀπολογισμοὺς εἰσήνεγκαν περὶ τῆς αὑτῶν εὐνοίας καὶ προθυμίας , ἣν παρέσχηνται Ῥωμαίοις κατὰ τὸν ἐνεστῶτα πόλεμον ·
21.22.4 οὔσης δὲ τῆς περὶ αὐτῶν δόξης ὁμολογουμένης , διότι γεγόνασι πάντων ἐκτενέστατοι τῶν ἐπὶ τῆς Ἀσίας αὐτονομουμένων , οὐκ ἀναγκαῖον ἡγούμεθʼ εἶναι τοὺς κατὰ μέρος ἐκτίθεσθαι λόγους .
Polybius, Histories (XML Header) [genre: prose] [word count] [lemma count] [Polyb.]. | ||
<<Polyb. 21.21.3 | Polyb. 21.21.10 (English) | >>Polyb. 21.22.7 |