| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 25.2.11 | Polyb. 25.3.5 (English) | >>Polyb. 25.4.3 |
25.3.2 καὶ τούτων ἐξετίθει προγραφὰς εἴς τε Δῆλον καὶ Δελφοὺς καὶ τὸ τῆς Ἰτωνίας Ἀθηνᾶς ἱερόν , διδοὺς οὐ μόνον τὴν ἀσφάλειαν τοῖς καταπορευομένοις , ἀλλὰ καὶ τῶν ὑπαρχόντων κομιδήν , ἀφʼ ὧν ἕκαστος ἔφυγε .
25.3.3 παρέλυσε δὲ καὶ τοὺς ἐν αὐτῇ τῇ Μακεδονίᾳ τῶν βασιλικῶν ὀφειλημάτων , ἀφῆκε δὲ καὶ τοὺς ἐν ταῖς φυλακαῖς ἐγκεκλεισμένους ἐπὶ βασιλικαῖς αἰτίαις .
25.3.4 ταῦτα δὲ ποιήσας πολλοὺς ἐμετεώρισε , δοκῶν καλὰς ἐλπίδας ὑποδεικνύναι πᾶσι τοῖς Ἕλλησιν ἐν αὑτῷ .
25.3.5 ἐπέφαινε δὲ καὶ κατὰ τὴν ἐν τῷ λοιπῷ βίῳ προστασίαν τὸ τῆς βασιλείας ἀξίωμα .
25.3.6 κατά τε γὰρ τὴν ἐπιφάνειαν ἦν ἱκανὸς καὶ πρὸς πᾶσαν σωματικὴν χρείαν τὴν διατείνουσαν εἰς τὸν πραγματικὸν τρόπον εὔθετος , κατά τε τὴν ἐπίφασιν εἶχεν ἐπισκύνιον καὶ τάξιν οὐκ ἀνοίκειον τῆς ἡλικίας .
25.3.7 ἐπεφεύγει δὲ καὶ τὴν πατρικὴν ἀσέλγειαν τήν τε περὶ τὰς γυναῖκας καὶ τὴν περὶ τοὺς πότους , καὶ οὐ μόνον αὐτὸς μέτριον ἔπινε δειπνῶν , ἀλλὰ καὶ οἱ συνόντες αὐτῷ φίλοι .
25.3.8 καὶ τὰ μὲν προοίμια τῆς Περσέως ἀρχῆς τοιαύτην εἶχε διάθεσιν . —
ὅτε μὲν ηὐξήθη καὶ τὴν κατὰ τῶν Ἑλλήνων ἐξουσίαν ἔλαβε , πάντων ἦν ἀπιστότατος καὶ παρανομώτατος , ὅτε δὲ πάλιν τὰ τῆς τύχης ἀντέπνευσε , πάντων μετριώτατος .
| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 25.2.11 | Polyb. 25.3.5 (English) | >>Polyb. 25.4.3 |
