| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 3.62.1 | Polyb. 3.62.10 (English) | >>Polyb. 3.63.6 |
3.62.6 κἄπειτα τῶν νεανίσκων ἤρετο τίνες αὐτῶν βούλονται διαγωνίσασθαι πρὸς ἀλλήλους ἐφʼ ᾧ τὸν μὲν νικήσαντα τὰ προκείμενα λαμβάνειν ἆθλα , τὸν δʼ ἡττηθέντα τῶν παρόντων ἀπηλλάχθαι κακῶν , τελευτήσαντα τὸν βίον .
3.62.7 πάντων δʼ ἀναβοησάντων ἅμα καὶ δηλούντων ὅτι βούλονται μονομαχεῖν , κληρώσασθαι προσέταξε καὶ δύο τοὺς λαχόντας καθοπλισαμένους ἐκέλευσε μάχεσθαι πρὸς ἀλλήλους .
3.62.8 παραυτίκα μὲν οὖν ἀκούσαντες οἱ νεανίσκοι ταῦτα καὶ τὰς χεῖρας ἐξαίροντες εὔχοντο τοῖς θεοῖς , σπεύδων ἕκαστος αὐτὸς γενέσθαι τῶν λαχόντων .
3.62.9 ἐπεὶ δʼ ἐδηλώθη τὰ κατὰ τὸν κλῆρον , ἦσαν οἱ μὲν εἰληχότες περιχαρεῖς , οἱ δʼ ἄλλοι τοὐναντίον .
3.62.10 γενομένης δὲ τῆς μάχης οὐχ ἧττον ἐμακάριζον οἱ περιλειπόμενοι τῶν αἰχμαλώτων τὸν τεθνεῶτα τοῦ νενικηκότος , ὡς πολλῶν καὶ μεγάλων κακῶν ἐκείνου μὲν ἀπολελυμένου , σφᾶς δʼ αὐτοὺς ἀκμὴν ὑπομένοντας .
3.62.11 ἦν δὲ παραπλησία καὶ περὶ τοὺς πολλοὺς τῶν Καρχηδονίων ἡ διάληψις · ἐκ παραθέσεως γὰρ θεωρουμένης τῆς τῶν ἀγομένων καὶ ζώντων ταλαιπωρίας , τούτους μὲν ἠλέουν , τὸν δὲ τεθνεῶτα πάντες ἐμακάριζον .
3.63.1
μετὰ ταῦτα προελθὼν αὐτὸς τούτου χάριν ἔφη παρεισάγειν τοὺς αἰχμαλώτους , ἵνʼ ἐπὶ τῶν ἀλλοτρίων συμπτωμάτων ἐναργῶς θεασάμενοι τὸ συμβαῖνον βέλτιον ὑπὲρ τῶν σφίσι παρόντων βουλεύωνται πραγμάτων .
| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 3.62.1 | Polyb. 3.62.10 (English) | >>Polyb. 3.63.6 |
