| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 7.17.5 | Polyb. 7.18.3 (English) | >>Polyb. 7.18.10 |
7.17.9 ὁ δʼ ἐπὶ τῆς πόλεως τεταγμένος Ἀρίβαζος ἀκάκως ὥρμησε πρὸς τὰς πύλας , αἷς ἑώρα προσβάλλοντα τὸν Ἀντίοχον , καὶ τοὺς μὲν ἐπὶ τὸ τεῖχος ἀνεβίβαζε , τοὺς δὲ διὰ τῆς πύλης ἀφιεὶς εἴργειν τοὺς συνεγγίζοντας καὶ συμπλέκεσθαι παρεκελεύετο τοῖς πολεμίοις .
7.18.1
καὶ τινὲς μὲν αὐτῶν διεμάχοντο πρὸς τοὺς ἀπαντῶντας , οἱ δὲ διέκοπτον τοὺς μοχλούς . ἅμα δὲ τούτοις προσπεσόντες ἔξωθεν οἱ τεταγμένοι πρὸς τοῦτο τὸ μέρος τὸ παραπλήσιον ἐποίουν .
7.18.3 ταχὺ δὲ τῶν πυλῶν ἀνοιχθεισῶν , εἰσελθόντες οἱ δισχίλιοι κατελάβοντο τὴν τοῦ θεάτρου στεφάνην .
7.18.4 οὗ γινομένου πάντες ὥρμησαν ἀπὸ τῶν τειχῶν καὶ τῆς Περσίδος προσαγορευομένης πύλης , ἐφʼ ἣν πρότερον ἐβοήθησαν οἱ περὶ τὸν Ἀρίβαζον , σπεύδοντες παρεγγυᾶν ἐπὶ τοὺς εἰσπεπτωκότας .
7.18.5 τούτου δὲ συμβαίνοντος , κατὰ τὴν ἀποχώρησιν ἀνεῳγμένης τῆς πύλης , συνεισέπεσόν τινες τῶν παρὰ τοῦ βασιλέως , ἑπόμενοι τοῖς ὑποχωροῦσιν .
7.18.6 ὧν κρατησάντων τῆς πύλης , ἤδη τούτοις κατὰ τὸ συνεχὲς οἱ μὲν εἰσέπιπτον , οἱ δὲ τὰς παρακειμένας διέκοπτον πύλας .
7.18.7 οἱ δὲ περὶ τὸν Ἀρίβαζον καὶ πάντες οἱ κατὰ τὴν πόλιν ἐπὶ βραχὺ διαγωνισάμενοι πρὸς τοὺς εἰσεληλυθότας ὥρμησαν φεύγειν πρὸς τὴν ἄκραν .
| Polybius, Histories (XML Header) [genre: prose] [word count] [lemma count] [Polyb.]. | ||
| <<Polyb. 7.17.5 | Polyb. 7.18.3 (English) | >>Polyb. 7.18.10 |
