Theocritus, Idylls (XML Header) [genre: poetry] [word count] [lemma count] [Theoc. Id.]. | ||
<<Theoc. Id. 1.1 | Theoc. Id. 1.30 (English) | >>Theoc. Id. 1.56 |
1.20καὶ τᾶς βουκολικᾶς ἐπὶ τὸ πλέον ἵκεο μοίσας ,
δεῦρʼ ὑπὸ τὰν πτελέαν ἑσδώμεθα , τῶ τε Πριήπω
καὶ τᾶν Κραναιᾶν κατεναντίον , ᾇπερ ὁ θῶκος
τῆνος ὁ ποιμενικὸς καὶ ταὶ δρύες . αἰ δέ κʼ ἀείσῃς
ὡς ὅκα τὸν Λιβύαθε ποτὶ Χρόμιν ᾆσας ἐρίσδων ,
1.25αἶγα δέ τοι δωσῶ διδυματόκον ἐς τρὶς ἀμέλξαι ,
ἃ δύʼ ἔχοισʼ ἐρίφως ποταμέλγεται ἐς δύο πέλλας ,
καὶ βαθὺ κισσύβιον κεκλυσμένον ἁδέι κηρῷ ,
ἀμφῶες , νεοτευχές , ἔτι γλυφάνοιο ποτόσδον .
τῶ περὶ μὲν χείλη μαρύεται ὑψόθι κισσός ,
1.30κισσὸς ἑλιχρύσῳ κεκονιμένος · ἁ δὲ κατʼ αὐτὸν
καρπῷ ἕλιξ εἱλεῖται ἀγαλλομένα κροκόεντι .
ἔντοσθεν δὲ γυνά , τὶ θεῶν δαίδαλμα τέτυκται ,
ἀσκητὰ πέπλῳ τε καὶ ἄμπυκι . πὰρ δέ οἱ ἄνδρες
1.34καλὸν ἐθειράζοντες ἀμοιβαδὶς ἄλλοθεν ἄλλος
νεικείουσʼ ἐπέεσσι . τὰ δʼ οὐ φρενὸς ἅπτεται αὐτᾶς ·
ἀλλʼ ὁκὰ μὲν τῆνον ποτιδέρκεται ἄνδρα γελᾶσα ,
ἄλλοκα δʼ αὖ ποτὶ τὸν ῥιπτεῖ νόον . οἱ δʼ ὑπʼ ἔρωτος
δηθὰ κυλοιδιόωντες ἐτώσια μοχθίζοντι .
τοῖς δὲ μετὰ γριπεύς τε γέρων πέτρα τε τέτυκται
λεπράς , ἐφʼ ᾇ σπεύδων μέγα δίκτυον ἐς βόλον ἕλκει
1.41ὁ πρέσβυς , κάμνοντι τὸ καρτερὸν ἀνδρὶ ἐοικώς .
φαίης κεν γυίων νιν ὅσον σθένος ἐλλοπιεύειν ·
ὧδέ οἱ ᾠδήκαντι κατʼ αὐχένα πάντοθεν ἶνες
καὶ πολιῷ περ ἐόντι , τὸ δὲ σθένος ἄξιον ἅβας .
1.25
1.30
1.34
1.41
Theocritus, Idylls (XML Header) [genre: poetry] [word count] [lemma count] [Theoc. Id.]. | ||
<<Theoc. Id. 1.1 | Theoc. Id. 1.30 (English) | >>Theoc. Id. 1.56 |