Theocritus, Idylls (XML Header) [genre: poetry] [word count] [lemma count] [Theoc. Id.]. | ||
<<Theoc. Id. 18.20 | Theoc. Id. 18.45 (English) | >>Theoc. Id. 19.1 |
18.35οὐ μὰν οὐδὲ λύραν τις ἐπίσταται ὧδε κροτῆσαι
Ἄρτεμιν ἀείδοισα καὶ εὐρύστερνον Ἀθάναν ,
ὡς Ἑλένα , τᾶς πάντες ἐπʼ ὄμμασιν ἵμεροι ἐντί .
ὦ καλὰ ὦ χαρίεσσα κόρα , τὺ μὲν οἰκέτις ἤδη ,
ἄμμες δʼ ἐς δρόμον ἦρι καὶ ἐς λειμώνια φύλλα
18.40ἑρψοῦμες στεφάνως δρεψούμεναι ἁδὺ πνέοντας ,
πολλὰ τεοῦς Ἑλένα μεμναμέναι ὡς γαλαθηναὶ
ἄρνες γειναμένας ὄιος μαστὸν ποθέοισαι .
πρᾶταί τοι στέφανον λωτῶ χαμαὶ αὐξομένοιο
πλέξασαι σκιερὰν καταθήσομεν ἐς πλατάνιστον ,
18.45πρᾶται δʼ ἀργυρέας ἐξ ὄλπιδος ὑγρὸν ἄλειφαρ
λαζύμεναι σταξεῦμες ὑπὸ σκιερὰν πλατάνιστον ·
γράμματα δʼ ἐν φλοιῷ γεγράψεται , (ὡς παριών τις
ἀννείμῃ ,) Δωριστί · σέβου μʼ · Ἑλένας φυτὸν εἰμί .
Χαίροις ὦ νύμφα , χαίροις εὐπένθερε γαμβρέ .
18.50Λατὼ μὲν δοίη , Λατὼ κουροτρόφος ὔμμιν
εὐτεκνίαν , Κύπρις δέ , θεὰ Κύπρις ἶσον ἔρασθαι
ἀλλάλων , Ζεὺς δέ , Κρονίδας Ζεὺς ἄφθιτον ὄλβον ,
ὡς ἐξ εὐπατριδᾶν εἰς εὐπατρίδας πάλιν ἔνθῃ .
εὕδετʼ ἐς ἀλλάλων στέρνον φιλότητα πνέοντες
18.55καὶ πόθον , ἔγρεσθαι δὲ πρὸς ἀῶ μὴ ʼπιλάθησθε .
νεύμεθα κἄμμες ἐς ὄρθρον , ἐπεί κα πρᾶτος ἀοιδὸς
ἐξ εὐνᾶς κελαδήσῃ ἀνασχὼν εὔτριχα δειράν .
Ὑμὴν ὦ Ὑμέναιε , γάμῳ ἐπὶ τῷδε χαρείης .
18.40
18.45
18.50
18.55
Theocritus, Idylls (XML Header) [genre: poetry] [word count] [lemma count] [Theoc. Id.]. | ||
<<Theoc. Id. 18.20 | Theoc. Id. 18.45 (English) | >>Theoc. Id. 19.1 |