Theocritus, Idylls (XML Header) [genre: poetry] [word count] [lemma count] [Theoc. Id.]. | ||
<<Theoc. Id. 20.1 | Theoc. Id. 20.30 (English) | >>Theoc. Id. 20.44 |
20.20ἆρά τις ἐξαπίνας με θεὸς βροτὸν ἄλλον ἔτευξε ;
καὶ γὰρ ἐμοὶ τὸ πάροιθεν ἐπάνθεεν ἁδύ τι κάλλος
ὡς κισσὸς ποτὶ πρέμνον , ἐμὰν δʼ ἐπύκαζεν ὑπήναν ,
χαῖται δʼ οἷα σέλινα περὶ κροτάφοισι κέχυντο ,
καὶ λευκὸν τὸ μέτωπον ἐπʼ ὀφρύσι λάμπε μελαίναις ·
20.25ὄμματά μοι γλαυκᾶς χαροπώτερα πολλὸν Ἀθάνας ,
καὶ στόμα δʼ αὖ πακτᾶς γλυκερώτερον , ἐκ στομάτων δὲ
ἔρρεέ μοι φωνὰ γλυκερωτέρα ἢ μέλι κηρῶ .
ἁδὺ δέ μοι τὸ μέλισμα , καὶ ἢν σύριγγι μελίσδω ,
κἢν αὐλῷ δονέω , κἢν δώνακι , κἢν πλαγιαύλῳ .
20.30καὶ πᾶσαι καλόν με κατʼ ὤρεα φαντὶ γυναῖκες ,
καὶ πᾶσαί με φιλεῦντι · τὰ δʼ ἀστικά μʼ οὐκ ἐφίλασεν ,
ἀλλʼ ὅτι βουκόλος ἐμμὶ παρέδραμε κοὔποτʼ ἀκούει ,
ὡς ὁ καλὸς Διόνυσος ἐν ἄγκεσι πόρτιν ἔλαυνεν ·
οὐκ ἔγνω δʼ , ὅτι Κύπρις ἐπʼ ἀνέρι μήνατο βούτᾳ
20.35καὶ Φρυγίοις ἐνόμευσεν ἐν ὤρεσι καὶ τὸν Ἄδωνιν
ἐν δρυμοῖσι φίλασε καὶ ἐν δρυμοῖσιν ἔκλαυσεν .
Ἐνδυμίων δὲ τίς ἦν ; οὐ βουκόλος ; ὅν γε Σελάνα
βουκολέοντα φίλασεν , ἀπʼ Οὐλύμπω δὲ μολοῖσα
λάθριον ἀν νάπος ἦλθε καὶ εἰς ἕνα παιδὶ κάθευδε .
20.40καὶ τὺ Ῥέα κλαίεις τὸν βουκόλον . οὐχὶ δὲ καὶ τὺ
ὦ Κρονίδα διὰ παῖδα βοηνόμον ὄρνις ἐπλάγχθης ;
Εὐνείκα δὲ μόνα τὸν βουκόλον οὐκ ἐφίλασεν ,
ἁ Κυβέλας κρέσσων καὶ Κύπριδος ἠδὲ Σελάνας .
20.25
20.30
20.35
20.40
Theocritus, Idylls (XML Header) [genre: poetry] [word count] [lemma count] [Theoc. Id.]. | ||
<<Theoc. Id. 20.1 | Theoc. Id. 20.30 (English) | >>Theoc. Id. 20.44 |