Cicero, Lucullus (XML Header) [genre: prose; philosophy] [word count] [lemma count] [Cic. Luc.]. | ||
<<Cic. Luc. 142 | Cic. Luc. 145 () | >>Cic. Luc. 148 |
144Quid me
igitur Luculle in invidiam [Note] et tamquam [Note] in contionem
vocas , et quidem ut seditiosi tribuni solent occludi
tabernas iubes ? quo [Note] enim spectat illud cum artificia
tolli quereris a nobis nisi ut opifices concitentur ; qui
si undique omnes convenerint facile contra vos incitabuntur . Expromam primum illa invidiosa , quod eos
omnes qui in contione [Note] stabunt exules servos insanos
esse dicatis . deinde ad illa veniam , quae iam non ad
multitudinem sed ad vosmet ipsos qui adestis pertinent . negat enim vos Zeno , negat Antiochus scire
quicquam . 'Quo modo ?' inquies ; 'nos enim defendimus etiam insipientem multa conprendere '.
145At scire
negatis quemquam rem ullam nisi sapientem . et hoc
quidem Zeno gestu [Note] conficiebat . nam cum extensis digitis adversam manum ostenderat , 'visum ' inquiebat
'huius modi est '; dein cum paulum digitos contraxerat , [Note]
'adsensus huius modi '; tum cum plane conpresserat
pugnumque fecerat , conprensionem illam esse dicebat ,
qua ex similitudine etiam nomen ei rei , quod ante non
-- -- num minus haec invidiose dicuntur ? nec tamen
nimis eleganter ; [Note] illa [Note] subtilius . Sed quo modo tu si
conprendi [Note] nihil posset artificia concidere dicebas nec
mihi [Note] dabas id quod probabile esset satis magnam vim
habere ad artes , sic ego nunc tibi refero artem sine
scientia esse non posse . an pateretur hoc Zeuxis aut
Phidias aut Polyclitus , nihil se scire , cum in iis esset
tanta sollertia ? quod si eos docuisset aliquis quam vim
habere diceretur scientia , desinerent irasci ; ne nobis
quidem suscenserent , cum didicissent id tollere nos
quod nusquam [Note] esset , quod autem satis esset ipsis
relinquere . Quam rationem maiorum etiam conprobat
diligentia , qui primum iurare ex sui animi sententia
quemque voluerunt , deinde ita teneri si sciens falleret ,
quod inscientia multa versaretur in vita ; tum qui testimonium diceret ut arbitrari se diceret etiam quod ipse
vidisset , quaeque [Note] iurati iudices cognovissent ut ea non
aut esse <aut non esse > [Note] facta sed ut videri pronuntiarentur .
ch. 48
Cicero, Lucullus (XML Header) [genre: prose; philosophy] [word count] [lemma count] [Cic. Luc.]. | ||
<<Cic. Luc. 142 | Cic. Luc. 145 () | >>Cic. Luc. 148 |