| Livy, ab Urbe Condita (XML Header) [genre: prose] [word count] [lemma count] [Liv.]. | ||
| <<Liv. 1.31.6 | Liv. 1.32.4 (English) | >>Liv. 1.32.10 |
1.32.2qui ut regnare coepit et auitae gloriae
memor et quia proximum regnum , cetera egregium , ab una
parte haud satis prosperum fuerat aut neglectis religionibus
aut praue cultis , longe antiquissimum ratus sacra publica ut
ab Numa instituta erant facere , omnia ea ex commentariis
regiis pontificem in album elata proponere in publico iubet .
inde et ciuibus otii cupidis et finitimis ciuitatibus facta spes
in aui mores atque instituta regem abiturum .
igitur Latini
cum quibus Tullo regnante ictum foedus erat sustulerant
animos , et cum incursionem in agrum Romanum fecissent
repetentibus res Romanis superbe responsum reddunt , desidem
Romanum regem inter sacella et aras acturum esse
regnum rati .
medium erat in Anco ingenium , et Numae et
Romuli memor ; et praeterquam quod aui regno magis necessariam
fuisse pacem credebat cum in nouo tum feroci populo ,
etiam quod illi contigisset otium sine iniuria id se haud facile
habiturum ; temptari patientiam et temptatam contemni , temporaque
esse Tullo regi aptiora quam Numae .
ut tamen ,
quoniam Numa in pace religiones instituisset , a se bellicae
caerimoniae proderentur , nec gererentur solum sed etiam indicerentur
bella aliquo ritu , ius ab antiqua gente Aequicolis
quod nunc fetiales habent descripsit , quo res repetuntur .
legatus ubi ad fines eorum uenit unde res repetuntur , capite
uelato filo —lanae uelamen est —'audi , Iuppiter ' inquit ;
'audite , fines '—cuiuscumque gentis sunt , nominat —; 'audiat
fas . ego sum publicus nuntius populi Romani ; iuste
pieque legatus uenio , uerbisque meis fides sit .' peragit
deinde postulata .
1.32.3
1.32.4
1.32.5
1.32.6
| Livy, ab Urbe Condita (XML Header) [genre: prose] [word count] [lemma count] [Liv.]. | ||
| <<Liv. 1.31.6 | Liv. 1.32.4 (English) | >>Liv. 1.32.10 |
