ch. 48
2.48.1
igitur non patrum magis quam plebis studiis K. Fabius
cum T. Uerginio consul factus neque belli neque dilectus
neque ullam aliam priorem curam agere quam ut iam aliqua
ex parte incohata concordiae spe, primo quoque tempore
cum patribus coalescerent animi plebis.
2.48.2itaque principio
anni censuit priusquam quisquam agrariae legis auctor tribunus
exsisteret, occuparent patres ipsi suum munus facere;
captiuum agrum plebi quam maxime aequaliter darent;
uerum esse habere eos quorum sanguine ac sudore partus
sit.
2.48.3aspernati patres sunt; questi quoque quidam nimia
gloria luxuriare et euanescere uiuidum quondam illud Caesonis
ingenium.
2.48.4nullae deinde urbanae factiones fuere; uexabantur incursionibus
Aequorum Latini. eo cum exercitu Caeso missus
in ipsorum Aequorum agrum depopulandum transit. Aequi
se in oppida receperunt murisque se tenebant; eo nulla
pugna memorabilis fuit.
2.48.5at a Ueiente hoste clades accepta
temeritate alterius consulis, actumque de exercitu foret, ni
K. Fabius in tempore subsidio uenisset. ex eo tempore
neque pax neque bellum cum Ueientibus fuit; res proxime
formam latrocinii uenerat.
2.48.6legionibus Romanis cedebant
in urbem; ubi abductas senserant legiones, agros incursabant,
bellum quiete, quietem bello in uicem eludentes. ita
neque omitti tota res nec perfici poterat; et alia bella aut
praesentia instabant, ut ab Aequis Uolscisque, non diutius
quam recens dolor proximae cladis transiret quiescentibus,
aut mox moturos [se] apparebat Sabinos semper infestos
Etruriamque omnem.
2.48.7sed Ueiens hostis, adsiduus magis
quam grauis, contumeliis saepius quam periculo animos
agitabat, quod nullo tempore neglegi poterat aut auerti alio
sinebat.
2.48.8tum Fabia gens senatum adiit. consul pro gente
loquitur: 'adsiduo magis quam magno praesidio, ut scitis,
patres conscripti, bellum Ueiens eget. uos alia bella curate,
Fabios hostes Ueientibus date. auctores sumus tutam ibi
maiestatem Romani nominis fore.
2.48.9nostrum id nobis uelut
familiare bellum priuato sumptu gerere in animo est; res
publica et milite illic et pecunia uacet.' gratiae ingentes
actae.
2.48.10consul e curia egressus comitante Fabiorum agmine,
qui in uestibulo curiae senatus consultum exspectantes
steterant, domum redit. iussi armati postero die ad limen
consulis adesse; domos inde discedunt.
