4.27.10illud eximium consilii
animique specimen et neutiquam uolgatae laudis, quod ultro
ad oppugnanda castra hostium, unde maiore agmine profectos
exploratum fuerat, M. Geganium cum cohortibus delectis
misit.
4.27.11qui postquam intentos homines in euentum periculi
alieni, pro se incautos neglectis uigiliis stationibusque est
adortus, prius paene cepit castra quam oppugnari hostes
satis scirent.
4.27.12inde fumo, ut conuenerat, datum signum ubi
conspectum ab dictatore est, exclamat capta hostium castra
nuntiarique passim iubet.
ch. 28
4.28.1
et iam lucescebat omniaque sub oculis erant. et Fabius
cum equitatu impetum dederat et consul eruptionem e
castris in trepidos iam hostes fecerat;
4.28.2dictator autem parte
altera subsidia et secundam aciem adortus, circumagenti se
ad dissonos clamores ac subitos tumultus hosti undique
obiecerat uictorem peditem equitemque.
4.28.3circumuenti igitur
iam in medio ad unum omnes poenas rebellionis dedissent,
ni Uettius Messius ex Uolscis, nobilior uir factis quam
genere, iam orbem uoluentes suos increpans clara uoce
'hic praebituri' inquit,
4.28.4'uos telis hostium estis indefensi,
inulti? quid igitur arma habetis, aut quid ultro bellum
intulistis, in otio tumultuosi, in bello segnes? quid hic
stantibus spei est? an deum aliquem protecturum uos rapturumque
hinc putatis?
4.28.5ferro uia facienda est. hac qua
me praegressum uideritis, agite, qui uisuri domos parentes
coniuges liberos estis, ite mecum. non murus nec uallum
sed armati armatis obstant. uirtute pares, necessitate, quae
ultimum ac maximum telum est, superiores estis'.
