ch. 5
6.5.1
iam et tribuni plebis ciuitate aedificando occupata contiones
suas frequentare legibus agrariis conabantur.
6.5.2ostentabatur
in spem Pomptinus ager, tum primum post accisas
a Camillo Uolscorum res possessionis haud ambiguae.
6.5.3criminabantur multo eum infestiorem agrum ab nobilitate
esse quam a Uolscis fuerit; ab illis enim tantum, quoad
uires et arma habuerint, incursiones eo factas;
6.5.4nobiles
homines in possessionem agri publici grassari nec, nisi
antequam omnia praecipiant diuisus sit, locum ibi plebi
fore.
6.5.5haud magno opere plebem mouerunt et infrequentem
in foro propter aedificandi curam et eodem exhaustam
impensis eoque agri immemorem, ad quem instruendum
uires non essent.
6.5.6in ciuitate plena religionum, tunc etiam ab recenti clade
superstitiosis principibus, ut renouarentur auspicia res ad
interregnum rediit. interreges deinceps M. Manlius Capitolinus
Ser. Sulpicius Camerinus L. Ualerius Potitus;
6.5.7hic
demum tribunorum militum consulari potestate comitia
habuit. L. Papirium Cn.† Sergium L. Aemilium iterum
Licinium† Menenium L. Ualerium Publicolam tertium
creat; ii ex interregno magistratum occepere.
6.5.8eo anno
aedis Martis Gallico bello uota dedicata est a T. Quinctio
duumuiro sacris faciendis. tribus quattuor ex nouis ciuibus
additae, Stellatina Tromentina Sabatina Arniensis; eaeque
uiginti quinque tribuum numerum expleuere.
