ch. 1
Cim.1.1
Cimon, Miltiadis filius, Atheniensis, duro admodum
initio usus est adulescentiae. nam cum pater eius
litem aestimatam populo solvere non potuisset ob
eamque causam in vinclis publicis decessisset, Cimon
eadem custodia tenebatur neque legibus Atheniensium
emitti poterat, nisi pecuniam, qua pater multatus erat,
solvisset.
Cim.1.2
habebat autem in matrimonio sororem germanam suam, nomine Elpinicen, non magis amore
quam more ductus: namque Atheniensibus licet eodem
patre natas uxores ducere.
Cim.1.3
huius coniugii cupidus
Callias quidam, non tam generosus quam pecuniosus,
qui magnas pecunias ex metallis fecerat, egit cum
Cimone ut eam sibi uxorem daret: id si impetrasset,
se pro illo pecuniam soluturum.
Cim.1.4
is cum talem condicionem aspernaretur, Elpinice negavit se passuram
Miltiadis progeniem in vinclis publicis interire, quoniam prohibere posset, seque Calliae nupturam, si ea
quae polliceretur praestitisset.
