papaveris sativi tria diximus genera, et sponte nascentis alia promisimus. e sativis albi calix ipse teritur et e vino bibitur somni causa. semen elephantiasi medetur. e nigro papavere sopor gignitur scapo inciso, ut diagoras suadet, cum turgescit, ut iollas, cum deflorescit, hora sereni diei tertia, hoc est cum ros in eo
-- --
exaruerit. incidi iubent sub capite et calice, nec in alio genere ipsum inciditur caput. sucus et hic et herbae cuiuscumque lana excipitur aut, si exiguus sit, ungue pollicis, ut lactucis, et postero die magis, quod inaruit, papaveris vero largus densatus et in pastillos tritus in umbra siccatur, non vi soporifera modo, verum, si copiosior hauriatur, etiam mortifera per somnos. opium vocant. sic scimus interemptum p. licini caecinae praetorii viri patrem in hispania bavili, cum valetudo inpetibilis odium vitae fecisset; item plerosque alios. qua de causa magna concertatio extitit. diagoras, erasistratus in totum damnavere ut mortiferum, infundi vetantes praeterea, quoniam visui noceret. addidit andreas, ideo non protinus excaecari eo, quoniam adulteraretur alexandriae. sed postea usus eius non inprobatus est medicamento nobili,
quod διὰ κωδυῶν vocant.
semine quoque eius trito in pastillos e lacte utuntur ad somnum,
item ad capitis dolores cum rosaceo; cum hoc et aurium dolori
instillatur. podagris inlinitur cum lacte mulierum - sic et foliis ipsis utuntur - , item ad ignes
sacros et vulnera ex aceto. ego tamen damnaverim collyriis addi, multoque magis quas
vocant ληξιπυρέτους quasque pepticas et coeliacas. nigrum tamen coeliacis in vino datur.
sativum omne maius.
-- --
rotunda ei capita, at silvestri longa ac pusilla, sed ad omnes effectus valentiora. decoquitur et bibitur contra vigilias, eademque aqua fovent ora. optimum in siccis et ubi raro pluat. cum capita ipsa et folia decocuntur, sucus meconium vocatur, multum opio ignavior. experimentum opii est primum in odore - sincerum enim perpeti non est - , mox in lucernis, ut pura luceat flamma et ut extinctum demum oleat, quae in fucato non eveniunt. accenditur quoque difficilius et crebro extinguitur. est sinceri experimentum et in aqua, quoniam ut nubecula innatat, fictum in pusulas coit. sed maxime mirum est aestivo sole deprehendi; sincerum enim sudat et se diluit, donec suco recenti simile fiat. mnesides optime servari putat hyoscyami semine adiecto, alii in faba.
